इगतपुरी तालुक्यातील घोटी ते त्र्यंबकेश्वर (राष्ट्रीय महामार्ग क्रमांक १६०) मार्गाच्या रुंदीकरणासाठी प्रस्तावित भूसंपादनाविरोधात शेतकऱ्यांचा तीव्र रोष उसळला असून आहुर्ली येथे कृती समितीच्यावतीने साखळी उपोषणाला सुरुवात झाली आहे. विस्थापनाचा आणि अन्यायकारक भूसंपादनाचा धोका वाढत असताना शासनाने शेतकऱ्यांच्या हरकतींकडे दुर्लक्ष केल्याचा आरोप उपोषणकर्त्यांनी केला आहे.
🔹 हरकतींकडे दुर्लक्ष; विश्वासात न घेता अधिसूचना जारी
घोटी–त्र्यंबकेश्वर महामार्गाच्या रुंदीकरणासाठी करण्यात येणाऱ्या नवीन भूसंपादन प्रक्रियेवर बाधित शेतकऱ्यांनी पूर्वीच लेखी हरकती दाखल केल्या होत्या. मात्र या हरकतींवर कोणतीही सुनावणी, चौकशी किंवा कारवाई न करता शासनस्तरावर भूसंपादनाची अधिसूचना जाहीर करण्यात आली. शेतकऱ्यांचा विश्वासघात करून प्रशासनाने एकतर्फी निर्णय घेतल्याचा आरोप निवेदनात करण्यात आला आहे.
🔹 इगतपुरी तालुका आधीच ‘अल्पभूधारक’; नव्या संपादनाला तीव्र विरोध
धरणे, लोहमार्ग, राष्ट्रीय व राज्य महामार्ग, औद्योगिक प्रकल्प, लष्करी क्षेत्र अशा विविध कारणांसाठी इगतपुरी तालुक्यातील प्रचंड प्रमाणात जमीन गेल्या अनेक वर्षांत संपादित करण्यात आली आहे. त्यामुळे तालुका आधीच ‘अल्पभूधारक’ झाला आहे. अशा परिस्थितीत पुन्हा भूसंपादन करून शेतकऱ्यांचे उरलेसुरले क्षेत्रही हिरावून घेण्याचा हा प्रयत्न असल्याचा आरोप आंदोलनकर्त्यांनी केला आहे.
🔹 जिल्हाधिकाऱ्यांना निवेदन; अधिसूचना मागे घेण्याची मागणी
कृती समितीच्यावतीने जिल्हाधिकारी, उपजिल्हाधिकारी (भूसंपादन), उपविभागीय अधिकारी व पोलीस अधीक्षक यांना निवेदन देण्यात आले असून अधिग्रहण प्रक्रिया तात्काळ थांबवावी, हरकतींची कायदेशीररीत्या सुनावणी करावी आणि शेतकऱ्यांना विश्वासात घेऊन चर्चेच्या माध्यमातून निर्णय घ्यावा, अशी प्रमुख मागणी करण्यात आली आहे.
🔹 उपोषणकर्त्यांमध्ये मोठी उपस्थिती
साखळी उपोषणात कृती समितीचे अध्यक्ष नागेश गायकर, सचिव गोरख वाजे, आवळीचे माजी सरपंच रामदास जमधडे, श्याम गायकर, सुखदेव पाटील गायकर, सोमनाथ शिरसागर, दत्तू गायकर, भाऊसाहेब गायकर, सुनील खकाळे, अरुण खकाळे, नवनाथ गायकर, किसन गायकर , मयूर कमलाकर, बाळासाहेब कोठुळे, वामन मोरे यांच्यासह बाधित गावांतील शेकडो शेतकरी सहभागी झाले आहेत.
शेतकऱ्यांचा हा लढा पुढे किती तीव्र रूप धारण करतो याकडे संपूर्ण जिल्ह्याचे लक्ष लागले आहे. प्रशासनाने यावर सहानुभूतीपूर्वक निर्णय घ्यावा, अशी सर्वांची अपेक्षा आहे.
